遭小巴司機喝令落車 爆谷男挑機「邊度有寫唔畀食」 兩乘客一人一句機智破僵局
【有線新聞】公眾場所爭執可免則免，網上熱傳一段小巴影片，片中坐車頭男乘客因車上吃爆谷引起司機不滿，議論一翻後司機決定停車，雙方僵持之下，一男一女乘客忍不住先後出聲，憑兩句「一語中的」說話解決事件。影片引起網民熱議，有人大讚「即刻上網揾同讀出法例嗰位阿姐好嘢，俾個讚你！」
不滿司機語氣強硬 出手機拍攝車內標語
影片可見，小巴在站頭上客時，坐車頭男乘客已拿出盒裝爆谷食用，當時司機即刻表態：「唔該你落返車吖，你係度食嘢就落返車，我個鏡頭影住你㗎。」男乘客似乎不滿司機態度強硬，開車後便拿出手機拍攝車內標語，然後再拿出爆谷繼續食。司機其後停車，雙方開始爭論。
「你再食嘢下一站落車呀。」司機說畢後，乘客便反問車上哪裡有明示「不准飲食」，「你攞出嚟畀我睇」。司機則反駁：「要寫到明㗎？夠冇（寫明）叫你畀錢咯，咁你又畀錢。」其後將小巴開至路邊停下，惟男乘客卻開始發難：「我而家係要食嘢呀！」司機隨即拿手機通報車行，稱「有鏡頭影住，你下載返條片落嚟。」
反指地鐵有標明 女乘客：不准飲食是常識
「邊度有鏡頭呀？嚟，我食緊嘢。」男乘客帶有挑釁意味望向鏡頭，繼續食爆谷。司機則表明上車已有講不准飲食，男乘客則堅持車上沒有明示，更「反證」地鐵車廂上有標明。雙方爭拗一輪，見情況膠著，終於有女乘客忍不住開腔，直言香港的公共交通工具不准飲食，但男乘客「企硬」反問的士內能否飲食，再重申「講到明係咪要打出嚟呀？」
「跟據香港法例第374條D章，車長有權拒絕任何違反有關規定……」女乘客網上搜索相關法例，再大聲讀出，惟男乘客仍聽不入耳，又反問「咩嘢規定呀？邊樣嘢規定呀？」，其後另一名男乘客看不過眼，一句說話終令「爆谷男」無話可說：「你畀人擺上網你自己戇Ｘ啫。」
遭男子「一句KO」 爆谷男逐位乘客道歉
最終男乘客「回心轉意」收拾爆谷盒，向司機表示歉意，最終小巴埋站後，他亦轉身向每位下車乘客逐個道歉。雖然事件得以收場，但影片照樣畀放上「大埔TAI PO」群組，觀看量更至少有14萬。網民批評「爆谷男」係要自己「衝出嚟」，「咁小學雞，又要縮仲想攞尾彩…」，並戲言「公共交通工具上都冇寫明不可隨處便溺，點解佢唔挑戰吓呢？」
