港女發文投訴萬寧購物被誤會偷竊　遭兩便衣保安箍頸、扯背囊拖行50米

【有線新聞】有港女日前在社交平台發文，指早前在萬寧尖沙咀分店購物後以自助收銀機付款，怎料離開時被兩名便衣保安誤會偷竊，更一度箍頸拖行50米。港女事後心有餘悸，直言「我以為俾人綁架，隻手到依家仲震緊」。不少網民對事件震驚，紛紛湧到萬寧Facebook專頁留言質疑「暴力執法」。萬寧今午回應本台查詢時表示，涉事兩名便衣保安經第三方保安公司聘用，已被即日解僱。

自助收銀機付款後離開　突遭兩女箍頸、扯背囊

女事主昨日（8日）在社交平台Thread發文，指當天早上前往萬寧位於尖沙咀的分店購買兩盒枇杷膏，使用自助收銀機付款後離開，怎料行至店外約50米處時，突遭兩名女子分別箍頸及扯背囊，兩人更大聲喝斥：「你跟我過嚟！你冇畀錢！你偷嘢！」兩人隨後將她拖回店內。女事主又指，自己當時一度扯下口罩，詢問對方是否認錯人，「佢哋兩個係咁扯住我行，我好驚，我係咁嗌救命，我真係係咁嗌救命」，惟附近路人亦只是望了一眼，未有理會。

女事主遭拖回店內時已經被嚇至落淚，隨即拿出收據向萬寧經理展示，並質問：「點解你會覺得我偷嘢？呢兩個女人扯住我行50米，箍住我條頸，拉住我個背囊，你睇我張收據我係有畀到錢」、「究竟發生咩事？你覺得我冇俾錢，你咪問我攞張收據睇囉，唔使扯住我入返舖頭啩」。

便衣保安「搭膊頭」示好　女事主心有餘悸：隻手仲震緊

最終經理證實是誤會一場，並解釋該兩名女子為店舖的便衣保安，其中一名便衣保安更向女事主「搭膊頭」示好，笑稱「唔好意思，誤會咗你」。女事主在帖文中表示對事件非常震驚，兩名保安既無穿制服、亦沒職員工，無故當街將其箍頸拖行，直言「我真係以為自己係俾人綁架，同埋當兩個女人同時扯走我嘅時候，我一個人係冇辦法掙扎到。我而家隻手仲震緊、個心仲跳得好快，打緊呢篇嘢嘅時候都有喊。」

網民斥恐怖　要求回應事件

她又說，自己當時光明正大拿著貨品離開店舖，並非鬼鬼祟祟，認為對方若有誤會可以上前索問收據，而非「扯返個客入舖頭」。她又幸慶當時有一名男途人目擊事件過程，對方亦願意為便衣保安的暴力「執法」作證，而自己事後亦有向萬寧客服投訴，但未獲回覆。

事件引起不少網民震驚，紛紛到萬寧Facebook專頁留言要求回應事件，「好恐怖！零售行業好似黑社會咁，當街扯人走？」「以後唔敢再去萬寧…我仲要平時都唔習慣拎單……」「有顧客幫襯你哋，竟然受到身體同精神傷害？」「以後點喺你度買嘢？」。