亞洲盃決賽｜阿菲夫12碼帽子戲法　卡塔爾挫約旦衛冕

【有線新聞】亞洲盃決賽，阿菲夫大演帽子戲法，協助東道主卡塔爾以3比1擊敗約旦，連續兩屆捧盃。

棗紅衫的卡塔爾，入局迅速送上前場，不過艾哈度斯控多腳，被艾阿查連閂走。另一邊約旦亦夠快，球速夠快，艾尼馬治勁射，門將只可以擋走。

「爆炸頭」阿菲夫，左路衝一段，壓入禁區跌倒博到12碼，被尼斯比從後踢跌。阿菲夫親自主射，窒一窒步，被捉到路都入，22分鐘卡塔爾領先。上屆破紀錄10次助攻，今屆搖身一變，變入球魔術師。

分組至淘汰賽6場全勝，卡塔爾的角球攻勢，盧卡斯文迪斯頭槌，門將快手托高，半場維持1比0。

換邊後，約旦大反擊，奧雲挑高自製倒掛，欠缺一點角度。四強淘汰南韓證明實力，晉身決賽絕非僥倖，艾阿拉比車身射門被擋。對卡塔爾狂追猛打，艾譚馬利窄位被撲，奧雲出奇不意後腳，只是射中網側。已創下歷來最佳成績，神奇之旅再見曙光，67分鐘約旦追平，艾尼馬治右腳接應，左腳一抽入網。

只是約旦開心時間太短，艾斯美穆罕默德禁區跌倒，球證初時未有表示，VAR提示要到場邊再看，證實艾馬迪出腳，球證判罰12碼。阿菲夫再次操刀，再入一球，卡塔爾73分鐘再次領先。

罰球都是交給他，阿菲夫直射被撲出。補時階段，卡塔爾錦上添花，阿菲夫單刀推得較深，被門將鴨都利拉撲跌，12碼再出現。半自動越位系統，顯示艾阿查連包越位。親自主射第三個12碼，阿菲夫完成帽子戲法，攻入今屆第8球成為神射手。

卡塔爾贏3比1奪標，自2004年後再有球隊蟬聯亞洲盃冠軍。