亞洲盃8強｜日本補時失十二碼　1比2負伊朗　8強戰出局

【有線新聞】亞洲盃，日本補時輸12碼，1比2不敵伊朗，8強出局。

亞洲一哥惡鬥二哥，只能活一隊，守田英正28分鐘的入球，領先是藍衫的日本。擺脫3位伊朗守衛，推回中間起腳，比蘭雲特用腳閂到都照入，「藍武士」半場領先一球。

上屆4強碰頭，日本3比0淘汰伊朗，換邊後，上田綺世飛身頭槌高出，錯失拉開機會。後防不集中，走漏莫希比要付出代價，伊朗55分鐘1比1。接應阿斯蒙妙傳，莫希比走到好位置，射遠柱入網。

扳平後，伊朗氣勢如虹，阿斯蒙高速壓入禁區，推過一個、兩個，射近柱入網。球證舉手指越位，一班伊朗職球員揮手，示意沒有，半自動越位識別系統顯示手肘突出來。

伊朗沒有洩氣，又是阿斯蒙，頭槌差一點點。之後伊沙杜拿希把握對方解圍不遠車身，鈴木彩艶接實，以為又要加時。補時4分鐘，日本的板倉滉情急出腳，就鑄成大錯，禁區踢跌簡安尼。查漢巴殊勁射入網，伊朗反勝2比1，報回上屆一敗之仇，晉級準決賽。