一線搜查｜長霸四公眾咪錶位做生意逾十年　屯門回收店：大家都可以泊、方便阿婆回收

香港泊車車位一向供不應求，《一線搜查》繼早前報道過深水埗一間學校門口有貨車長期霸佔咪錶位後，再接獲多名觀眾報料，指多區都有類似事件發生，除了有寶馬私家車長期霸佔公共咪錶位，更有本地網購平台長期用作上落貨、回收公司「咪錶位當舖位」。

寶馬被指長霸旺角咪錶位　投訴人：佢好識走法律罅

其中在旺角，有寶馬私家車長霸佔碧街的咪錶位。投訴人陳先生（化名）向《一線搜查》表示，該車長自從收到匿名投訴後，每隔兩天便會前來倒一倒車，換不同車位繼續停泊，「佢好識走法律罅，佢會前後郁，或者出咗個框再褪返入嚟」。

有街坊就報料指，該寶馬的車主更動用全家輪流協助入錶，過往曾在同一車位連續停泊三日後企圖移位，並要求其他車主讓出泊車位。「佢叫人哋俾個車位佢，嗰個人話唔俾。第二日佢返嚟就頂住人哋，唔俾人哋走，佢點要攞呢個車位，啲人就覺得佢好過份。」

翻查網上地圖，由2020年12月起，經常看到該寶馬私家車停泊在附近位置。而《一線搜查》攝製隊在上月農曆新年前到現場觀察，亦發現該車連續兩日停泊同一位置，並在車頭放置紙條，聲稱「已在24小時內離開過此車位並再次泊車。如有任何查詢，請聯絡車主。」

街坊：相差幾百元唔泊停車場、好低能

陳先生直言，附近有不少食肆，然而泊車位僅得5個，很多人想泊車也泊不到。「佢哋冇車位泊，而呢個人可以霸住個車位。其實香港咁多停車場，既然你都唔揸走架車，點解你唔泊停車場？唔係但求自己一時方便而去影響其他人㗎嘛，呢啲就係自私行為！」

另一街坊黃先生（化名）就說：「點解唔泊停車場呢？一定要泊死呢個位？我知道係話（因此）相差幾百元，所以唔泊停車場，好低能，哈哈。即係叫人哋講話我郁過，個個都可以咁講㗎啦，個個都泊死一個位啦，冇可能咁樣㗎嘛其實！好影響要泊呢個位嘅人，呢度已經少車位，佢又泊死係到唔郁，好影響！」

公眾咪錶位變公司私家位　屯門回收店長霸四車位做生意

除了旺角外，《一線搜查》亦接獲不少觀眾報料，指屯門建豐街有約12個貨車咪錶位，但有4個車位長期被一間回收店霸佔。雖然員工有定時入錶，然而他們不但將公眾咪錶位變公司私家位，甚至「錶位當舖位」，長霸錶位做生意。

「佢搭把遮又坐咗係到，啲呀婆就推住啲紙皮、爛鐵過嚟，佢就係到收。」投訴人張先生（化名）透露，該回收店有約6至8輛貨車，長期霸佔4個車位，貨車一裝滿便會開另一輛空車頂替車位。「基本上嚟一部（自己公司貨車），佢就褪一部，你行去排咩隊？冇排隊㗎喎呢啲。總之佢一部換一部，睇落去係合法嘅。冇得投訴，用咩方法投訴？」

負責人反駁：錢夠比較少啦！李嘉誠拎出嚟分啦好冇！

涉事的回收店位置與停車位有約9分鐘的路程，翻查網上地圖可見，該回收店原來長霸車位已經長達十多年。對此，負責人受訪時就振振有詞稱，並非為了個人利益，而是為了遷就附近長者進行回收，「係啲婆婆話嗰度（車位）近啲佢哋咋嘛，方便啲人咋嘛，我哋自己都有舖頭，就返啲婆婆去嗰度咋嘛。如果係政府話唔得，我哋都可以嚟返呢度收，冇所謂。等啲呀婆走遠啲咋嘛，我哋冇所謂㗎，由得啲呀婆行遠啲、行九里遠，由得佢行囉，有乜所謂。」

被問到香港車位較少，長霸車位行為是否有不妥時，負責人更激動稱：「錢啊夠比較少啦！李嘉誠拎出嚟分啦好冇？香港錢都比較少，叫啲有錢佬拎出嚟，大家分咗佢！」、「佢可以早過我哋去泊咪得囉，我架架車都係咁郁㗎，大家都可以泊㗎，係咪先？你都想人哋唔要咁多錢，畀咗你㗎，你唔去叫李嘉誠畀啲錢你？」

被指長霸5車位上落貨　網購平台：已要求部門跟進改善

除了該回收店外，12個車位中有5個車位亦被一間本地網購平台長期用作上貨落貨，而其貨倉正正在車位對面。而他們不但長霸車位，甚至沒有入咪錶。

翻查地圖，該網購平台則在4、5年前開始長期霸位，即意味著建豐街約12個貨車咪錶位中，有多達9個遭人長期霸佔。而多年來，街坊亦只能啞忍。張先生：「見到有時滾滾地（憤怒），一行過嚟見到又係你哋、又係呢4個位、6個位被你哋霸咗。希望佢哋自律啲，搞返好，唔好成日都係佢哋擺晒。」

警方回覆《一線搜查》查詢時指，去年首11個月，共接獲109宗涉及旺角碧街違泊及霸佔咪錶位的投訴、發出3,043張告票；而屯門建豐街就有149宗投訴、發出2,727宗告票。食環署亦指，接獲5宗涉及屯門建豐街一帶的投訴、發出14張移走障礙物通知書、8張告票。

至於被指霸佔車位的網購平台就指，今年初接獲一宗相關投訴，公司在得知情況後，已要求物流及倉務部立即跟進及改善，包括嚴正訓示相關員工、避免於咪錶位泊車時間過長，以及停泊期間必須按錶付費。