移民｜以移民為條件拍拖 港女IG呻男友臨出發反口 網民撐分手：一開始就呃緊你！
移民外國是近年不少人談論的話題，近日有位正打算移民英國的網民在IG「couple.murmur」匿名投稿，大呻自己在拍拖前與已經男友達成共識，將來會到英國結婚生仔，但男友在她準備填寫表格，找搬屋資料時卻反口說想留在香港，令事主不知所措，決定投稿問網民意見，以下為原文節錄：
以移民生仔為拍拖條件
「今年28，同男朋友同齡，我哋係透過婚姻介紹所認識嘅。間介紹所係我家姐同朋友開，初期因為啱啱開業就遇到社運，加上我當時單身，所以如果有啲對象適合我，我都會去食個飯咁。我想要嘅條件係黃，計劃5年內移民英國或澳洲同埋生2個小朋友。我好鍾意小朋友，但香港唔係一個適合生小朋友嘅地方，我甚至覺得香港唔適合人生存，周圍發生嘅事真係令人好抑鬱。咁啱個陣有個男仔提出嘅條件幾乎一樣咁濟，佢希望同女朋友移民英國同埋佢都希望32歲前生兩個或以上小朋友組織家庭。我家姐就比咗啲資料我，一切順利我哋成為咗男女朋友。」
「其實我哋喺香港都可以生小朋友」
「因為我之前係做護士，但唔太開心，所以再讀關於it嘅degree，今年畢業都順利搵到一份可以work form home嘅工作，意思係即使移民都可以返，唔洗擔心移民會失業。男朋友份工都係咁，我哋兩個各有大約80萬儲蓄，經濟上無大問題。按我哋一直計劃，我哋應該會係下年年頭或年中走，咁我就開始做啲實質嘅工作，填表格，睇吓英國租屋同搬屋資料咁。點知有日佢同我講，其實我哋喺香港都可以生小朋友呀，佢呀哥都生咗三個，都無諗過走都生活得好幸福呀。」
「想知咁嘅家庭點叫幸福」
「我真係好驚愕，問佢係咪認真，佢話係。佢呀嫂無業mk妹嚟，佢呀哥收入得萬三，排緊上公屋未上到，依家住啲好細間嘅套房，五個人一間房，三個小朋友訓上格床，佢同老婆訓下格床。三個小朋友要喺間屋生活都唔容易，特別係細仔升咗小學，每次做功課其中一個小朋友要坐係床用枱仔，另外兩個小朋友用飯枱，睇到都「牙煙」。或者有人會話窮可能都生活得好開心，但佢呀嫂都唔太理啲小朋友淨係玩手機煲劇，啲小朋友就喺屋企睇YouTube同Netflix。連個小朋友跌親都唔知，佢個仔打俾我男朋友話媽咪訓覺叫唔醒，想知咁嘅家庭點叫幸福。」
政治因素決心離港
「最大嘅問題係政治，身邊好多護士朋友已經有小朋友，佢哋好多都移咗民，因為佢哋見到19年開始多咗好多人因為社會事件而自殺，好多人因為抑鬱入院。醫院嘅做法就係同個病人講比自己時間休息放鬆下，暫時都係唔好睇新聞啦。究竟我要點教我小朋友？「呀仔，呢幾個字唔可以再講，再講要坐十年監㗎」「我知，我知佢哋係無後果係唔啱，但佢哋有槍。」如果到時候再有社運，我係咪要比個小朋友出去定抑或我要教佢唔好睇新聞？
咁我將以上嘅想法同佢講，佢同我講佢再諗下。明明我哋一直為移民做好計劃，甚至佢係我畢業寫咗張卡比我話希望我哋後年嘅今日我哋會Tower Bridge唱london bridge is falling down，我以為我哋一直向同一個目標前進，但到依家我再問佢，佢同我講佢唔肯定，佢唔知道佢到底移唔移民。」
偷睇男友電話揭發謊言
「我有日偷睇佢電話，我見到佢同佢呀哥傾計，話「我一開頭以為我會改變到佢嘅諗法」「我一開頭無諗清楚」。依家講起移民嘅嘢佢就會靜咗，但咁根本無可能一齊落去，上個星期我同佢講如果你唔移民，其實我哋可能一齊唔到落去，係愛嘅，但每個人都有自己想要嘅嘢，就係因為唔想經歷咁嘅場面，咁我一開始先會用嚟啲條件揀男朋友，我以為我哋傾好咗。但佢喊得好犀利，又話求下我唔好咁快作決定，唔好分手。其實我都好兩難，佢對我好好，我都好愛佢，於是傾好話佢最遲下年2月要話比我知個決定，因為最遲我下年年尾真係要走。」
「係咪應該長痛不如短痛？」
「依家即使同佢拍拖好開心，佢比好多驚喜我，但開心完又好唔開心，好似佢一話決定好唔移民我哋就會分手咁。覺得佢好自私，佢好似呃咗我咁，依家連想買嘢比佢，都會放返低，會諗或者我哋聽日就分手。成日會諗或者我哋只係一齊多一年，即使依家幸福好似倒數緊咁，成件事好辛苦。大家有無咩提議，其實係咪應該長痛不如短痛？」
網民撐分手
帖文引來大批網名留言，其中大部分都支持事主分手：「如果佢堅持都係唔肯移民嘅話，真係建議你分手會比較好；繼續喺埋一齊摩擦同爭執只會越來越多，無謂浪費自己時間。」、「直接斷吧，老實講由一開始真係講好咗了，所以無拖嘅必要，最後真係移咗幾年後佢又話要返香港，到時先唔知點。」、「根本你男朋友一開始就係呃緊你，諗住一齊左就可以氹到你留低，你咁清楚自己想點，其實都唔洗上嚟問，信自己、忠於自己。」亦有網民提議事主最好移民後再找對象才最實質。
（全文完）
推薦閱讀：
盧瀚霆Anson Lo剖白入行三年辛酸 MIRROR成軍後常受謠言攻擊 終強大內心正面回應大眾
張韋怡7歲兒子一週內第二次受校園暴力 IG出文怒訴：今日被拳打肋骨！
😊 為生活增值 Like 👉有線生活FB
💪 睇健康貼士 Like 👉有線健康FB
🔔 接收最新生活資訊 follow 👉 有線生活IG @icable.life
