網絡熱話｜內地客香港搭的士坐車頭睇導航　遭司機狂鬧：最憎你哋坐車頭

【有線新聞】香港的士服務質素屢遭詬病，近日再有內地旅客在抖音上傳影片，指日前在香港乘坐的士時因坐車頭及打開導航，被的士司機沿途不斷斥責及譏諷，對方更直言「我哋啲香港的士司機，最憎你哋（內地客）坐車頭，好好睇咩風景！」影片一出隨即引起兩地網民熱議，有內地網民更留言詢問「香港嘅朋友，坐的士唔可以坐車頭嗎？」

打開導航即被鬧　樓主解釋：我冇懷疑繞路

該名女網民表示，日前與兩名友人由旺角一間酒店乘坐的士前往西九龍高鐵站，其中一人坐車頭副駕駛位置，自己與另一人則抱著背囊坐在後座。途中友人發現其他地方有車龍，於是詢問車程時間，惟當自己打開導航企圖查看即時位置時，的士司機突然開口狂鬧。「我一開始好好跟他解釋，讓他別多心、不要那麼敏感，我沒有懷疑他繞路，我只是想看看還要多久，順便告訴朋友他在香港地圖的哪個位置，結果他越罵越難聽。因為我兩個朋友都聽不懂粵語，所以全程沒有說話。」

司機狂寸：睇咩風景啫？好好睇咩香港啲風景？

據其上傳的影片可見，該名司機邊開車邊不屑道：「搭嗰幾廿蚊的士，仲要懷疑個司機兜路。」女乘客聞言隨即反駁：「我幾時懷疑你兜路先，我坐個車，我開我自己導航有咩錯先？」司機則繼續不滿稱：「你哋啲內地人搭的士，你知唔知我哋啲香港的士司機，最憎你哋（內地客）坐車頭，好好睇咩風景！我租畀你啦，一千蚊一個鐘，揸飽佢啦！」

女乘客則說：「咁之後有人坐你車頭，你可以拒絕㗎！」司機直斥：「後面無位畀你坐咩？係要坐車頭做咩啫？係咪好鍾意玩揸車？睇咩風景啫？好好睇咩香港啲風景？」女乘客怒道「人哋坐上嚟之前你無講喎，你可以同人講你唔好坐車頭，你唔鍾意人哋坐車頭你可以講㗎！你今日心情唔好，唔好搵啲乘客出氣好冇？」

否認搵人出氣　司機：係你哋有問題呀！

司機隨即否認自己找人出氣，揚言「係你哋有問題呀！」女乘客反問:「我哋有咩問題先？唔畀錢定係點樣？我整邋遢你架車定係點樣？」而此時的士亦到達目的地，前排乘客見狀默默支付車資，司機接過後繼續揶揄「找錢呀嘛，你搭唔起㗎」，甚至在乘客全下車後回頭出言譏諷「我租畀你啦，一千蚊個鐘呀，玩揸車啦！廢柴！」

批司機態度惡劣　網民：影衰晒香港

影片隨即引起不少兩地網民關注，更有人轉載至各大社交平台群組，不少人怒斥的士司機態度惡劣，「影衰晒香港」、「乘客開導航睇都好正常，想知仲有幾耐才到，司機梗係自己心有鬼！」、「咁多怨言就唔好揸車搵食」、「有樣有車牌投訴佢啦」、「心情唔好，就唔好攞啲客嚟出氣啦！」、「車頭唔係位咩？客人可以選擇坐架喎」。

更有內地網民留言稱「想問下香港嘅朋友，坐的士唔可以坐車頭嗎？」、「去過一次香港就不想去了」；不過亦有部分網民認同不應該坐車頭，指「我自己從來不會坐那位置的」，為至有網民分享類似經歷，指曾經因坐車頭遭司機破口大罵，更被對方趕下車。