網絡熱話｜「糉葉吹乾留下年再包糉」言論惹怒網民　綠領行動急刪字眼補鑊

【有線新聞】端午節假期剛結束，相信不少市民有食糉應節。環保團體綠領行動日前就在社交平台發文，呼籲市民食完糉後可保留竹葉，又指「洗返乾淨吹乾就可以循環再用，下年再包過糉又得」，結果遭大批網民留言質疑罔顧食物安全。綠領行事後急忙補救，刪走「下年再包過糉又得」的字句。

綠領行動10日在其facebook專頁發文，提醒市民端午節長假期亦勿忘環保，除了可以選擇進食素糉以減少碳排放外，更建議市民食完糉後可保留竹葉，「食完糉之後，塊竹葉去咗邊呢？唔係就咁抌落垃圾桶掛…. 其實洗返乾淨吹乾就可以循環再用，下年再包過糉又得，大家可以盡情發揮創意小宇宙」。

帖文隨即引起不少網民留言討論，不少人質疑「保留竹葉循環再用，下年再包過糉」的說法，批評罔顧食物安全，留言譏諷道「唔該小編一年後用返啲洗乾淨嘅糉葉包糉，再食畀我哋睇」、「記得紀錄有冇食物中毒」、「我留返起啲葉送俾你地出年包糉」、「去完廁所啲廁紙都記得曬乾再用呀！」、「會唔會去叫啲酒樓糯米雞啲荷葉洗乾淨返用？咁樣全港啲酒樓都可以一起參與環保呀！」、「綠領不如收集糉葉OK嘛？可以拎去總部」，甚至有人直言「你哋成班人已經走火入魔，明明office日日開大個冷氣，叫人重用塊葉去環保。」

不過亦有人認真討論，指「糉葉經過包裹加熱之後會變脆，唔可以再用，只可以當廚餘處理，不如話唔食糉最環保」、「我都知呢件事好痴線，但我屋企人真係會咁做，我抵抗唔到，唯有接受」。

眼見言論引起網民怒火，綠領行動昨天隨即補救，不但修改帖文，刪走「下年再包過糉又得」的字句，更限制只有追蹤專頁24小時以上的用戶才可以留言，不過網民仍可透過facebook編輯紀錄翻查原始版本。