車CAM直擊｜灣仔私家車自製「十字路口」　連衝3燈、橫跨6行車線　網民揭發係慣犯

【有線新聞】馬路炸彈！近日網上瘋傳一段車Cam影片，可見一輛私家車駛至灣仔鵝頸橋橋底時，司機不但連衝3個紅燈，更無視只准左轉的交通標誌，剷上行人過路處兼橫跨6條行車線，直駛出駱克道。影片引起網民譁然，直斥司機行為離譜，認為單是扣分阻嚇性不夠，應該直接判罰終身停牌，甚至有人揭發涉事私家車為慣犯，曾目擊對方逆線行駛。

根據影片可見，事發在本月1日晚上約8時許，當時一輛黑色私家車沿堅拿道西行駛，駛至鵝頸橋橋底一個燈口位置時，不但無視紅燈，更對只可轉左的交通標誌牌視若無睹，邊打左燈邊向前行駛，橫越包括電車路軌在內的4條行車線。

私家車隨後直鏟上行人過路處，此時行人交通燈亮起紅燈，有巴士及的士正沿軒尼詩道往銅鑼灣方向行駛，私家車只稍作等待，見車輛駛離後，隨即橫跨剩餘的2條行車線，往駱克道方向駛去。其行為引起途人側目。

片主亦有上傳交通舉報平台的截圖，顯示成功舉報涉事私家車司機危險駕駛的行為。

不少網民亦留言斥責司機行為極度危險，「點只扣分呀！又衝燈又行行人過路處！根本就冇資格揸車！而且剛才仲有巴士經過！唔判佢終身停牌同坐返幾個月唔得啦！」、「橫跨六條線！真係大地任我行！」、「點解可以諗到呢條線？」、「建議大幅加罰款，亂拋垃圾都3000（元）」、「未考到牌時就循規蹈矩，有牌在手就沒人有我咁瘋癲⋯⋯」、「自制十字路口」、「應該要终生停牌」、「幾多條罪？唔該大家幫手數一數」。另外，亦有人認出涉事私家車，指「呢架嘢4月尾在灣仔巴路士街，以純熟技術逆線轉右去灣仔道」。