單親母做10年地盤工養家　港男試工一日即愧疚落淚：我以前睇唔起地盤佬

近日有網民在連登討論區以「今日第一日跟老母做地盤，食飯嘅時候我喊X咗」為題，出帖分享自己首次與母親到地盤工作，事主本以為自己健身兩年，能夠輕鬆應付，但沒想到原來連3包水泥也推不動，最後午飯時更因為媽媽一句說話愧疚落淚，感動不少網民。

以下為連登網民「會員破樸吧」原文：

拒做廢青決定跟母做地盤

「我老豆老母喺我好細個嘅時候就離咗婚，我自細就跟老母生活，老母讀書唔多，一直都只能做藍領，例如保安，仲要係十二碼嗰啲，我未起身佢已經出門，到我放學放工佢都未收工。

一次機緣巧合，佢識人介紹做地盤，一做就做咗十年，係就係搵多咗工作時間又少咗，但就經常聽到佢抱怨呢度痛果到痛。

至於我畢業後，就一直打份hea工，返工就係上連登果種，直至疫情失業日日做廢青，當積蓄都洗晒美股輸晒，我終於決定跟我老母做地盤。」

健身兩年連3包英泥也推不動

「今日係第一日，老母一早起身煮好飯裝好畀我帶，我問佢點解唔夜晚果餐煮多啲，佢話隔夜唔好食，想畀我食好啲。

終於出門，未去到地盤我已經出晒汗，到做嘅時候仲辛苦，我自問做gym兩年都頂唔順，一包英泥40kg我一次一包咁抬上架一個轆嘅雞公車，總共三包。

當我想推嘅時候，X你老母推唔郁，我調整下姿勢，降低重心再推，X你老母成車反咗，最後都要我老母走過嚟幫我。」

一句「夠唔夠食」令事主落淚

「終於熬到12點食飯，我哋搵咗個位坐低，我諗起我以前睇唔起地盤佬，而我依家好似個乞衣咁坐喺地下食飯。

我望一望我老母，佢問我夠唔夠食，唔知點解我嘅眼淚突然湧出嚟，我即刻低頭望住個飯，係咁眨眼，試圖將眼淚擠返入去：『夠呀你食啦…』」

網民：你識咁諗證明你喺正途上

帖文獲近7千讚好，不少網民被事主故事感動，留言叫事主要好好體諒母親辛酸：「啱啦，等你呢啲自以為高高在上嘅人感受下你老母湊大你條契弟係幾咁辛酸」、「女人喺地盤成日畀人呼呼喝喝，如果係真嘅你真係要孝順你老母」、「真正愛自己細路嘅父母，動力係好大，你識咁講證明你仲細。你識咁諗證明你喺正途上」。

亦有網民給了忠告：「體力勞動最忌用死力夾硬頂，多多都唔夠你傷（尤其係腰），睇吓有冇人教到你點樣慳力／避免受傷」、「雞公車唔係推，係逗，紮好馬步，伸直微曲逗高，貢桿原理，尾高過頭自然帶到架車仔行。」、「先學為主，人地動作係點你跟足慢慢嚟，唔係好易整傷」。

（全文完）

常見問題

問：為何男事主會跟媽媽去做地盤工？

答：因為男事主失業後花光積蓄及炒燶美股…👉🏻詳情請看

問：網民如何評論事？

答：網民多留言鼓勵事主要孝順母親…👉🏻詳情請看

推薦閱讀：

移民｜以移民為條件拍拖　港女IG呻男友臨出發反口　網民撐分手：一開始就呃緊你！

😊 為生活增值 Like 👉有線生活FB
💪 睇健康貼士 Like 👉有線健康FB
🔔 接收最新生活資訊 follow 👉 有線生活IG @icable.life