一線搜查｜猴群長沙灣天主教墳場「踩場」　鮮花、生果秒被搶　市民嚇親：佢哋會跳過嚟搶袋

四月是傳統的掃墓季節，然而觀眾李先生近日向《一線搜查》投訴，指長沙灣天主教墳場頻頻有大批馬騮出沒，不但讓掃墓的市民措手不及，就連墳場辦事處亦深受其擾。

「一級級，有啲就企喺頭頂鐵欄行嚟行去、有啲係兩邊爬落嚟、有啲係後面行過嚟。佢直頭係四方八面走埋嚟，我惟有急急腳，擺低啲花就走。」觀眾李先生表示，有關情況並非今年才出現，往年亦是如此，自己曾經與親友向墳場辦事處投訴，惟對方表示同樣感到困擾。

李先生：「我一行轉背，出到樓梯嗰度，已經見到頭先擺低嘅鮮花已經被佢哋一人一下掹走晒，拎去食，呢啲花只係幾秒已經俾佢整爛晒。」李先生曾致電1823投訴，惟政府部門僅表示會關注事件並採取驅趕措施，又建議如遇到緊急情況可報警求助。李先生無奈表示：「根本就冇乜用囉，就算我最近去都一樣有呢個情況出現。政府覆我叫我打999，喂、我打得嚟都已經俾佢（馬騮）襲擊咗啦，我俾佢襲擊完，再打999都冇用啦！」

攝製隊實地探訪時，發現墳場內掛有多條橫額，提醒市民提防馬騮。每年都來掃墓的劉女士表示，經常與馬騮相遇，形容馬騮會望實食物、搶食生果，更曾試過整袋水果被搶走，「好驚呀，佢哋直頭搲，好彩我哋即掉，冇同佢（馬騮）鬥。俾佢搶嗰次，我去搵職員，咁之後每年嚟都有幾隻（馬騮），但係我搵支棍或遮，篤篤篤篤，都幾驚㗎！」

市民鍾先生則說：「佢哋（馬騮）通常企係墓碑頂睇住，有時兩、三隻，每隻霸住一個墓碑，睇住啲人上嚟。如果啲人挽住個袋，佢懷疑入面有食物，都會跳過嚟想搶。當然驚啦，啲馬騮如果搶嘢，佢會咬、會抓，唔會就咁搶就算數。但係一年兩次（掃墓）我都會嚟，你拜先人，冇理由為咗佢唔嚟， 唯有小心防範。」

另一名市民鍾先生就指：「咁多年嚟都有馬騮，如果見到食物或者花，佢哋好自然就會攞走，最好唔好帶食物嚟呢度，同埋墳場方面都做多啲清潔。」

漁護署回應稱，該墳場靠近金山郊野公園，因此不時有馬騮出現。一般情況下，馬騮不會主動騷擾人類，但市民應避免用食物引誘牠們，以免引發滋擾。署方表示，已透過絕育措施控制馬騮數量，調查顯示過去三年，金山、獅子山及城門郊野公園的馬騮數量保持在約2,000隻。署方提醒市民切勿在馬騮面前進食，並指出與馬騮對視可能被視為挑釁，建議避免眼神接觸以策安全。

78 HOY資訊台：《一線搜查》
播出日期：逢周一至五
播出時間：晚上8時77台首播、10時半78台重播
WhatsApp報料熱線：68960931
節目重溫請＜按此＞