一線搜查｜石籬商場天橋壞燈數月冇人理　管理公司、房屋署互相卸責　街坊怒斥：無王管

有線新聞
2025年03月24日

石籬商場一期及二期之間設有天橋連接，是街坊日常往來的便捷通道。不過《一線搜查》接獲觀眾投訴，指天橋有三支光管長期損毀，導致燈光昏暗，安全堪憂。投訴人曾多次聯絡商場管理公司及房屋署處理，然而陷入雙方互相推卸責任的「拉鋸戰」，問題拖延數月仍無人處理。直至《一線搜查》介入後，事件始獲解決。

家住葵青區石籬邨的黎先生，每天途經該天橋。他憶述，自去年11月起，天橋上有三支光管損壞，導致夜晚照明不足，於是以電郵向管理公司反映情況。兩周後，對方回覆指該位置由房屋署負責，已即時通知有關部門跟進。然而，黎先生苦等無果，遂於12月21日致電1823投訴，卻在兩天後收到回覆，房屋署指天橋不屬其管轄範圍，建議他自行聯絡管理公司。

黎先生認為兩邊不斷推卸責任，於是再次電郵查詢管理公司，對方則再次重申商場對有關位置沒有管理權，所以未能跟進情況，但強調會聯絡房屋署及1823，以釐清管理權問題。直至上月，黎先生收到石籬邨物業服務辦事處回覆，稱天橋保養由商場業主負責，並已多次催促管理公司處理。原以為致電1823就能解決問題，怎料雙方互相推卸責任，黎先生無奈道：「其實係非常唔滿意，覺得佢哋用官方答法耍我哋啲居民。感覺就好似政府賣咗物業之後就無王管，我覺得換支光管其實好簡單嘅事，而家就好似兩頭唔到岸，搵1823、搵石籬商場，都冇人負責。」

《一線搜查》攝製隊實地調查發現，天橋雖然設有8盞燈，但當中3盞已經損壞，另有1盞燈殼破損，入夜後現場會較為昏暗。街坊陳女士受訪時說：「有時夜晚行係覺得好黑，老人家眼都唔係幾好，太暗行路辛苦，睇唔清。加上有時落雨，雨濺入到嚟，唔小心跣親點辦？我見過老人家跣親，所以我覺得為咗老人家、小朋友，要整光啲。」另有長者抱怨指：「一入夜就黑呀嘛，梗係有影響，覺得好危險。」

前葵青區區議員林紹輝就透露，天橋光管已損毀多時，前年年底卸任區議員時亦曾經作出投訴，「當時房署應承係佢哋搞嘅，我記得係因為我做咗廿幾年區議員，我記得曾經係房署搞過，換燈咋嘛，其實好多燈燒啦、暗啦、燈殼又污糟，變成成條天橋到夜晚燈光係唔足夠。」林紹輝直言整件事匪夷所思，認為更換光管只是小事，沒有必要為此爭論一年多、兩年。