一線搜查｜觀塘連鎖豬肉檔呃秤三成　攝製隊放蛇直擊　揭專業慣犯有齊劇本

購物最重要是明碼實價，童叟無欺，不過近日有觀塘的街坊向《一線搜查》報料，指瑞和街有連鎖豬肉檔公然呃秤，不少街坊都曾「中招」。《一線搜查》攝製隊更親身放蛇實測，發現豬肉足足少了三成，行為相當過分。

呃秤20%至25%　投訴人：絕非個別事件

「如果你呃一両、二両，老實講就唔會知，但佢真係呃得太多，一斤呃三、四両就好明顯，成20%至25%。」報料人林先生表示，發現被呃秤後，隨即返回該連鎖豬肉檔查問，怎料對方有備而來，完全並不愕然，爽快補回豬肉，「我反而愕然，佢好似知道件事咁嘅，就話如果我買排骨呢，排骨要斬，斬開時整走咗、跳走咗，或者叫包漏咗咁嘅意思。」

林先生又質疑，「如果（豬肉檔）冇心呃人嘅話，佢自己會秤下、秤下究竟係唔係真，究竟係自己唔小心，定係顧客呃佢，正常佢會秤下㗎嘛。佢唔係㗎喎，佢係直情攞嗰排骨落嚟斬、斬、斬，入返落去咁樣㗎喎，好似係知道自己錯咗咁㗎喎。」他又說，這絕非個別事件，自己過去亦曾上當受騙，因此要將事件公諸於世，避免再有街坊被騙，更要杜絕呃秤的風氣。

攝製隊放蛇直擊　職員辯稱：斬飛咗、斬漏咗

《一線搜查》攝製隊亦親身放蛇，假扮成顧客分別在觀塘瑞和街其中四間豬肉檔購買一斤豬肉，當中兩檔均足秤，另一檔則多收了3、4元。至於涉事的連鎖豬肉檔更為離譜，竟「呃秤」三成，多收金額18元。記者隨後返回該連鎖豬肉檔與職員對質，對方未有確認豬肉重量就已經不斷辯稱「斬飛咗、斬漏咗幾塊」、「頭先搵唔到你，而家補返畀你。」

職員的說辭如同劇本一般，與報料人林先生的情況無異。而當記者表明身份後，職員堅決否認「呃秤」，再強調是「斬漏咗、唔小心」，又稱「有時人忙嗰時斬排骨，漏咗都情有可原㗎。」而其身旁另一位職員亦幫口辯稱：「唔係唔老實，頭先嗌你都嗌唔切，頭先我提醒佢漏咗。」職員又隨手在旁邊撿起一塊五花腩肉，當作排骨放入記者的膠袋內，打算平息事件。然而當記者要求再次磅重時，發現仍然不夠秤，多收了5元。

集團無回覆　街坊：預咗佢呃、少少梗有啦

對於豬肉檔懷疑呃秤，《一線搜查》事後嘗試以WhatsApp向有關連鎖豬肉檔集團查詢，惟未有回覆。

不少街坊亦曾經遭遇呃秤事件，但因為嫌麻煩未有作出投訴或報海關。街坊張先生：「預咗佢呃啦，少少梗係會有㗎啦。（記者：咁悲觀呀？）哎啊，咁公道呀？我就唔信啦！」陳先生：「檔檔都唔夠秤㗎呢度買嘢！（記者：點解你會知嘅？）我又係做街市嘅。買一斤半菜俾人呃咗三両，覺得唔抵呀嘛，係咪先？我試過啦，你唔好（期）望，佢成日話畀多你，唔使畀多，你畀夠我就得㗎啦。」葉先生：「佢呃咗秤呀，人哋下次都唔會幫襯佢啦，做衰自己個名，呃人哋一、兩蚊，第二次人哋唔幫襯㗎啦。」

海關回應《一線搜查》時就指，高度關注瑞和街豬肉檔懷疑呃秤情況，正密切跟進，如果發現違反《條例》情況，會果斷採取適當執法行動。發言人又說，海關去年進行了1,700次巡查，向45個違反條例的商戶發出書面警告。

78 HOY資訊台：《一線搜查》
播出日期：逢周一至五
播出時間：晚上8時77台首播、10時半78台重播
WhatsApp報料熱線：68960931
節目重溫請＜按此＞