一線搜查｜遊大馬遇車禍致鼻樑移位　網約導遊失蹤拒認責　女事主後悔：錯信小紅書

不少人外遊會選擇自由行，能夠靈活安排行程，不過《一線搜查》近日接獲觀眾報料，指自己與家人前往馬來西亞旅行，並透過小紅書平台推介預約當地一名司機兼導遊，怎料到達當地後猶如被「賣豬仔」，除了每天由不同司機接載，更在旅途期間遭遇車禍，自己更被撞至鼻樑移位。然而車禍發生後，司機竟未有協助報警及聯絡救護車，最終他們在流血受傷的情況下，在馬路邊截車前往醫院。

「選擇佢（導遊）嘅原因係因為小紅書上面好多用戶推薦佢，話佢好似幾熱情，我哋好信任佢嘅原因就係佢識廣東話同普通話。」陳小姐與家人於今年一月前往馬來西亞自由行，出發前她參考小紅書的推介，透過微信聯絡了當地一名導遊，並預約包車服務。陳小姐：「佢哋應該係同一個人，第一日見到佢（導遊），係佢接我哋；跟住第二日，佢就安排咗第二個人嚟車我哋，佢話係佢姑丈嚟嘅；第三日，佢又換咗個司機，就同我哋講係佢表弟。」

包車遭車禍　「網約導遊」無報警　路邊截車求救

行程至第三天，陳小姐與家人更遭遇車禍，「我哋六個人入面，其實有三個人都受咗傷，其中兩個係擦損、撞瘀。我當時比較嚴重啲，口同鼻一直流血，當時都好驚，因為我唔知馬來西亞嗰邊call白車係點call，我哋係路邊度等，又流緊血，持續十幾分鐘都冇白車、都冇警察嚟。」

陳小姐：「成對眼嘅範圍全部瘀晒，呢個位置（鼻樑）裂咗，其實撞完車之後，成塊面、成個鼻都係腫，包括眼角位置全部都裂開。」最終他們要求導遊幫忙在街上攔截車輛，陳小姐與家人被送往當地一間公立醫院，進行止血、洗傷口及電腦掃描。「佢哋醫院唔接受我呢個病人，原因係公立醫院佢哋放假，要去到年初三之後或者年初四後先會有人返工。」陳小姐指，導遊原本答應會幫忙尋找醫生，但聲稱已經致電查詢五間專科醫院均未有營業。最後更稱沒有找到醫院，著眾人回香港再處理傷勢。至於費用方面，對方初時稱可以雙方商量，惟至當天下午便失去聯絡，未有再回覆。

「網約導遊」失蹤　事主報警

平日透過微信與導遊溝通，但事發後已被對方封鎖，陳小姐在不知如何處理下，最終決定報警求助。陳小姐：「報咗警，留低晒所有資料，警察叫我哋返屋企等消息。我又重新將之前受傷啲相，同埋想搵到導遊出嚟同佢傾嘅問題，都有同警察WhatsApp講多次，咁個警察都有話同我哋跟進，但去到最後冇咗回事。因為我發現佢個WhatsApp有開自動刪除功能，即係我今日同佢講嘅嘢，佢聽日就會自動刪除咗。我唔明點解一個政府機構，係可以咁樣去敷衍了事。」

《一線搜查》在小紅書推介涉事導遊的帖文中發現，近一、兩個月仍有不少人想聯絡他包車。記者隨後透過微信聯絡對方，他初時非常熱情推介行程，包車開價每日500元馬幣（折合約880港元），然而當記者表明身份並問及其關於陳小姐的事件後，就迅速遭對方封鎖。

後悔信小紅書推介　事主：未必網上睇到就係事實

意外發生至今已經超過一個月，陳小姐的傷勢仍未復元，仍要等待安排接受手術，「醫生話眼角撞裂位置唔需要做手術，純粹鼻樑要做手術。（有冇擔心個費用會好貴？）擔心呀，同埋始終係塊面到，都擔心影響面容。」她又說，是希望透過自己的經歷，提醒市民去旅行前一定要小心留意，「我建議真係搵返旅行社處理，經旅行社包車同埋導遊會安全啲，因為有起事上嚟，你起碼知道導遊嘅身份信息，始終公司承擔責任上會好啲。經過今次件事，未必網上睇到就係事實，真係要搵多啲資料先。」

另外，由於陳小姐未有購買旅遊保險，若果導遊拒絕承擔責任的話，則需要自己支付所有費用。有保險業界就指，旅遊保險除了有意外保障之外，最重要是萬一出事可以在當地得到緊急支援。香港保險業聯會行政總監劉佩玲指，目前大部分市面上的旅遊保險亦涵蓋包車服務，「包車發生嘅意外就係交通意外，由交通意外引起的傷亡及醫療費用均受到旅遊保險的保障，我哋相信包車同普通使用交通工具分別唔大。而最重要、最重要，我個人覺得除咗醫病或死亡保障，就係廿四小時的緊急支援服務，緊急支援服務可以提供一啲意見俾你，甚至幫你搵醫生。」

78 HOY資訊台：《一線搜查》
播出日期：逢周一至五
播出時間：晚上8時77台首播、10時半78台重播
WhatsApp報料熱線：68960931
節目重溫請＜按此＞