一線搜查｜漏水問題各執一詞 樓上法團主席澄清三大質疑：唔係錢嘅問題、錢唔係我困難嚟㗎
《一線搜查》日前跟進一宗漏水個案，觀眾陳生投訴住所客房天花板滴水近一年，惟水務署及滲水辦經調查後均找不到漏水源頭，所以決定終止調查，陳生最終自行聘請專家，發現問題很大機會源自樓上單位。對於有關專家的報告，《一線搜查》聯絡到樓上單位業主，對方同時是該大廈的業主立案法團主席，他強調政府人員先後進行多次測試，均顯示自己單位並無任何問題，又稱「如果有漏水，有人話我聽呢度滲水，我願意整㗎，唔係錢嘅問題，錢唔係我困難嚟㗎，我住得呢度管理費都5,000、6,000啦，點會係我困難啫。」
澄清三點質疑 法團主席：咁點解政府查唔到呢？
「如果你哋個專家話我有爆（水喉），係，啱，多數滲水係因為樓上嘅單位，我同意，咁點解（政府）佢哋查唔到呢？」法團主席接受《一線搜查》訪問時澄清陳生三點質疑，「我哋呢個大廈客廳下面嘅地台係冇水喉，呢個係第一點；第二點，所有食水喉、廁所喉、煤氣喉都係由外牆入屋，如果要滲，就滲外牆，係唔會室內滲去室外。同埋呢邊嘅房係冇水喉。」
至於第三點指其外牆疑有深色物質漏出，他說是滲水辦早前進行色水測試造成，「我漏嗰到，煤氣公司嚟睇過㗎啦，我冇漏煤氣或者我曾經有漏過。呢個顏色係佢哋（滲水辦）做測試嗰陣時引起呢個情況。食環署、屋宇署佢哋做過測試，總共做3次，其中一個測試係用顏料粉嚟做。」
法團主席：若果政府嘅專家話我有問題 我願意做任何嘢
法團主席氣憤道：「嗱！呢個大廈到今日（我）都係主席，好唔好？我同你講嘅嘢千真萬確嘅真，如果係經過3個政府部門（結果）都係咁樣，你要上法庭，我咪攞呢三個政府部門嘅信出嚟。如果你有專家，你咪叫專家出嚟，睇個官信私家專家定係信屋宇署專家？我冇嘢可以處理！我當時講得好清楚，若果政府嘅專家話我有問題，我願意做任何嘢！政府專家畀信我話冇問題！如果佢再要搞，叫佢外父攞錢買我單位，照市價，冇問題，我賣俾佢！」
指「香港地用錢解決問題」 法團主席：錢唔係我困難嚟㗎
「香港地用錢解決問題！一係去法庭同我鍊過，如果佢鍊得贏，佢鍊唔贏，我律師費都係佢嘅！嗱，我個女係律師，我個仔係大律師，嚟呀，嚟，歡迎！你已經去晒政府三大部門，欠特首辦，你咪幫佢去特首辦請願！」法團主席又重申自己並非不願意維修，「我願意整㗎，如果有漏水，有人話我聽呢度滲水，我願意整㗎，唔係錢嘅問題，錢唔係我困難嚟㗎，我住得呢度管理費都5,000、6,000啦，點會係我困難啫。」
專家：民事訴訟或花費高達70萬元
現時雙方各執一詞，有專家認為，最終可能要透過法律解決，雙方拿著相關的報告，委託律師透過調解或者仲裁方式解決，如果仍然沒法解決，就要進入民事訴訟，一般而言可能要花費數十萬元。如果雙方有爭議，費用甚至達70萬元。
滲水辦回覆《一線搜查》查詢時，指去年1月曾到陳生及樓上單位進行兩次色水測試，但仍沒法確認滲水源頭，去年5月已經委派合約顧問公司進行第三階段專業調查並到有關單位視察。基於滲水位置上方無用水或供水設施，微波斷層掃瞄技術沒法有效使用，經專業評估後採用地台蓄水測試及牆身灑水測試，惟未能確定滲水源頭，因此按既定程序暫時停止跟進個案。
小業主無奈嘆：滲水辦幫唔到市民
至於專家報告中提及懷疑供水管破裂引致滲水，滲水辦就指，以她們理解，水務署會進一步調查。不過，水務署回覆時就指，如果滲水辦在調查期間發現有浪費食水的證據，署方會根據《水務設施條例》執法。另外，水務署亦提到曾先後3次到有關單位視察，曾進行水錶流量測試，期間水錶並無轉動，故無證據證明該單位因食水供應喉管失修引致浪費供水的狀況，但就指會繼續跟進有關個案。
對此，陳先生坦言感到無奈，「政府部門又幫唔到手，搵唔到原因，咁樣滴法都話冇證據顯示樓上係漏水，我諗唔單止係我，香港都有好多個案係搵唔到源頭。但係冇辦法，只可以講話香港呢個滲水辦呢啲部門係幫唔到市民。」
《一線搜查》HOY TV77台
播出日期：逢星期一至五
播出時間：20:00-20:30
78台 22:30重播
WhatsApp報料熱線：68960931
節目重溫請＜按此＞
