一線搜查｜濕疹纏身10年類固醇藥膏無效　蔓延全身紅腫滲水　藥劑師教改善方法助生活復常

濕疹可以稱得上是香港最流行的皮膚病，一年四季都有機會發病，有研究更估計每20位香港人中，就有一人患上濕疹。有註冊藥劑師坦言，目前不管西醫或中醫都未有根治濕疹方法，但仍可以靠其他途徑改善及紓緩，令患者回復正常生活。

濕疹是一種會引發皮膚紅腫及發炎的皮膚病，有機會是遺傳、免疫失衝、接觸過敏濕或刺激物而引致發作，普遍患者除了出現紅腫痕癢外，更會起水泡、流膿及流血。臨床營養學家李健彰表示，濕疹反映身體正在發炎，而發炎有很多原因，外在因素包括環境上的空氣污染、吸二手煙、碰到洗潔精、洗手液、酒精等；亦可能是飲食方面內在的因素，進食特別多加工的食物，公仔麵、快餐等。李健彰又指，壓力及情緒等亦會有所影響，甚至壓力可能是導致濕疹發作的主要成因，而最常見是中學生準備考文憑試前爆發濕疹。

「可能轉天氣，佢就會開始痕，我會搽啲保濕潤膚嘅嘢，有時有效，有時就唔得，然後繼續蔓延到其他部位，身體、手腳都會有。」阿怡10年前身體開始出現濕疹，多年來嘗試不同方法醫治，可惜成效並不大，「大概10年前唔知咩原因情況下爆發濕疹，初時只係局部地方出現，然後蔓延到全身都有。最嚴重時候係𢯎到全身損晒、流血。醫生都冇話到原因，只係話我細個時候應該都有濕疹，但我幾肯定我係冇。」

「有時可能瞓覺唔知道𢯎損咗，佢就會黐住啲衫，你起身搣走佢就會好痛。」濕疹發作更令阿怡徹夜難眠，身心均受到影響，「返工嘅時候佢都會好痕，你就會周身𢯎，人哋就會見到，會有唔開心，因為用唔同方法佢都唔好。著衫盡量遮住，冬天遮到唔緊要，夏天點都會露到手、腳出嚟，冇辦法，唔想俾人睇到。」

中西醫都試過，亦曾買過聲稱有紓緩作用的藥膏或潤護膚，但阿怡的情況都未見好轉，「西醫門診通常開西藥同類固醇藥膏，通常初時食藥有控制到（濕疹發作），但啲藥食晒後，再搽藥膏都冇效。」

註冊藥劑師尹惠玲就坦言，目前不管西醫或中醫都未有根治濕疹方法。「知道好多患者用好多時間、金錢、心機去搵斷尾嘅方法，但係呢一刻，無論係中醫定西醫，我哋都未搵到斷尾嘅方法。所以如果有人話你知可以擔保你斷尾，我可以擔保佢係呃你。」

雖然未有根治方法，但仍有改善紓緩的方法，尹惠玲：「痕就好難唔𢯎，𢯎就會損，所以止痕係第一樣，例如外用類固醇、口服的抗過敏藥，或止痕的沐浴露等。止痕後就可以搽潤膚膏，令皮膚可以修復肌膚屏障，等佢夠時間21日至28日生返靚皮膚出嚟。不過她提醒，如果類固醇不恰當使用，過量、過度使用會出現副作用，包括皮膚變薄、皮膚色素會變深或淺、突然停藥後會復發，而入眼更會影響眼睛，容易患青光眼或白內障。

另外，飲食同濕疹息息相關，尹惠玲提醒患者要飲食輔助。而李健彰亦指，在飲食上可以改善濕疹，當中Omega-3經醫學認證可以抗炎，「日日都食魚，食唔到就食粒魚油丸」。

《中國海外呈獻：一線搜查》HOY TV77台
播出日期：逢星期一至五
播出時間：20:00-20:30
78台 22:30重播
WhatsApp報料熱線：68960931
節目重溫請＜按此＞