意大利盃｜拉素主場3比1擊敗拿玻里　晉級8強

【有線新聞】意大利盃16強，拉素主場3比1擊敗拿玻里。

淺藍衫拉素的柏度入楔被拿玻里門將卡比利撲跌，獲得12碼。薩卡尼操刀，卡比利「捉到路」撲走，將功補過。拉素仍然佔盡優勢，入球只是時間問題，洛斯連近門頂入，32分鐘打開缺口。迪查奧拿開出角球，基葛頭槌頂回龍門口，洛斯連無人看管下完成任務。

但只開心了4分鐘，利尼斯起腳被拍到，還有基奧雲尼施蒙尼衝前快一腳補中，為拿玻里扳平，這支意甲榜首球隊留力聯賽，派副選上陣。41分鐘走漏了洛斯連再要付出代價，禁區控定攻入個人第2球，拉素再領先。完半場前門將文達斯反應快，用腳擋走基奧雲尼施蒙尼撞射，保住2比1優勢回更衣室。

為免夜長夢多，拉素換邊後5分鐘再入一球，又是洛斯連大演「帽子戲法」，這位荷蘭前鋒夏天才由維羅納轉投，12場意甲入了兩球，但今場盃賽個人包辦3球。之後拿沙利抽射，過不到門將，拉素都贏3比1，晉級8強，對烏甸尼斯鬥國際米蘭的勝方。拿玻里星期一凌晨有復仇機會，聯賽主場再鬥拉素。