廖孖記腐乳｜指做生意要講誠信　黃傑龍：絕冇可能靜雞雞更換、仲繼續收咁多錢

【有線新聞】百年老字號廖孖記腐乳被指不是香港製造並兩度被食安中心驗出含菌量超標，負責人廖晃業今日（22日）出席電台節目時承認，因未能符合排污條例，過去30年均是從內地供應商購入白腐乳加工。敘福樓主席兼行政總裁、稻苗飲食專業學會榮譽會長黃傑龍事後在社交平台發文評論事件，強調生意要講誠信，直言「如果因為某啲社會嘅原因或者法例嘅原因，某一種工序已經唔可以再喺香港造，只能夠坦誠同消費者講，係唔係繼續買係消費者嘅決定。」

父親身教　學懂「貨真價實」觀念

黃傑龍在文中憶起17年前接手敘福樓時，行業開始講究「中央工場」，買現成點心、包裝上湯。而當時敘福樓的經營方式仍相當傳統，所有點心每日由師傅新鮮現場制作，上湯亦是現場師傅熬製。當時他以改革者身份自居，遂接見了一位包裝上湯的供應商，怎料因此被父親嚴厲斥責，並禁止該供應商再踏入酒樓。

黃傑龍說，事件令他印象深刻，亦從父親身教中學懂了「貨真價實」的觀念，強調「有啲嘢係會貴啲成本，有啲嘢係比較效率低，但係更加重要嘅係保留某一啲價值觀」。他亦坦言，當然童話故事不會只有完美結局，一直堅持人手做不代表生意好，「所以後來大家都知所有敘福樓結業，但係到結業之前最後嗰一日，我哋所有點心、上湯都仲係現場做」。

黃傑龍：絕對冇可能詐詐諦諦、靜靜雞換咗唔話俾人聽

他指出，「如果30年前某一個生產腐乳重要過程已經變咗唔係自己做，咁之後你啲宣傳、訪問、點可以繼續講返真嘅一樣現場做？如果因為某啲社會嘅原因或者法例嘅原因某一種工序已經唔可以再喺香港造，只能夠坦誠同消費者講，係唔係繼續買係消費者嘅決定。」他強調，事件與是否老字號無關，所有商業活動都要誠信行先。

他又以自己新開的店鋪作例子，指「如果有一天，我哋變成喺深圳搵一啲現成嘅漢堡扒嚟賣，為咗控制成本，我都一定事先會同大家講，絕對冇可能詐詐諦諦、靜靜雞換咗唔話俾人聽，繼續收人咁多錢。當然，我亦都冇咁蠢會走去咁樣做，因為我爸爸17年前已經好認真咁教咗我做生意講誠信呢個終極道理」。