網絡熱話|紅的誤闖元朗行人隧道 司機遭途人鬧爆 網民:真係離譜
![網絡熱話|紅的誤闖元朗行人隧道 司機遭途人鬧爆 網民:真係離譜](https://icable-prod.s3.ap-southeast-1.amazonaws.com/wp-content/uploads/2024/06/04005918/61-1.jpg)
【有線新聞】不時會有駕駛者因誤信坊間導航應用程式,導致行錯路,甚至駛入掘頭路、樓梯等。近日有網民分享,元朗有的士竟誤駛入行人隧道,引起不少網民熱論。
該名網民日前在社交平台Facebook群組上載一段長約37秒的影片,可見當時已經入夜,一輛市區的士停在了行人隧道前的行人路,樓主疑不滿的士司機對其響咹示意,於是上前質問對方:「呢到係行人隧道,你『咇』X我!」,而司機則回應指「我唔識路」,樓主不滿斥責「你唔識路?你識唔識閃燈?」,司機見狀隨即道歉「對唔住、對唔住,係我錯!」。
樓主未有理會,繼續質問對方:「咁你行行人隧道?你有考牌㗎嘛!你咁X大個人!你有的士牌,呢到係行人隧道,你知㗎嘛!」司機則繼續道歉求饒,「對唔住,放過我啦,我真係唔識路,個App帶路,我真係唔知」。最終樓主表示放過對方離開,惟警告「你下次入元朗你小心啲」。
影片引起不少網民留言討論,有人批評司機行為如同「危險駕駛」、「呢個唔係識唔識路嘅問題,係基本嘢,行人隧道都入咗去,真係離譜」、「點止唔識路,路牌指示都唔識,考牌唔識都有牌,問佢係咪只識講大話?」、「唔好以為司機真係唔識路,根本就係博嗰到冇乜人貪快,我踩單車上飛鵝山遇過兩次的士司機逆線沿路落嚟」。不過亦有人批評樓主態度惡劣,「的士佬唔啱就緊啦、一係報警一係就講兩句叫佢小心啲畀人走、鬧又鬧完、仲講咩叫做入元朗小心啲、元朗你大X哂呀!」、「客氣啲啦,人地都幾十歲,有乜咁大不了,最多罰錢啫」。