U23亞洲盃八強　卡塔爾2比4日本

【有線新聞】U23亞洲盃八強，日本踢到加時，4比2擊敗十人應戰的卡塔爾。
趁對手未入局，藍衫日本的山田楓喜偷截推到禁區邊勁射一腳，65秒先開紀錄。卡塔爾還以顏色，艾耶薛迪傳中，艾拉維頂得精彩，24分鐘追平。分組賽2勝1和，艾拉維因傷缺陣兩場，再次正選就立功。日本的松木玖生，守衛力逼下都傳到，不過細谷真大臨門一腳慢了半步。同一組合再來一次，細谷真大快不過出迎門將，還要倒地，被鴨都拿跳起踢中腹部。經VAR覆核，鴨都拿直接紅牌被逐。
卡塔爾踢少個靠罰球攻勢，阿度沙林頂入，換邊後的49分鐘反超前，看得日本球迷面色蒼白。木村誠二批入遠柱，為日本找回好氣色，67分鐘2比2。尾段圍攻卡塔爾，後備入替的藤尾翔太，頭槌被接實。U23亞洲盃三甲直入巴黎奧運，日本自1996年每屆奧運都有份。藤尾翔太連續三次機會把握不到，窄位掠門而過，2比2進入加時。日本踢到101分鐘，細谷真大射穿大細龍門，再度領先3比2。卡塔爾長時間十人應戰，捱到加時已盡全力，内野航太郎112分鐘補中，日本贏4比2，四強對伊拉克和越南勝方。