網絡熱話｜日式連鎖超市壽司膠盒變紙盒　全密封如抽盲盒　網民揶揄：飲食業好快玩完

【有線新聞】「走塑」首階段實施，多間食肆即日起外賣不再提供膠餐具，改用紙製或木製餐具代替。雖然首階段未涵蓋外賣用的膠蓋及膠食物容器，但有網民發現連鎖超市DON DON DONKI近日已將透明壽司盒改為用密實紙盒，引起不少網民熱議，有人更留言揶揄如同壽司盲盒。

該網民在社交平台Facebook群組上傳圖片，從照片中可見，超市過往以膠盒盛載魚生及壽司，如今改為密實的紙盒，盒上貼有壽司款式的照片，惟顧客沒法再經透明膠蓋檢查食物的新鮮程度。樓主在帖中亦指「完全睇唔到內籠」，並不禁嘆息「失去咗先識得珍惜」。

網民質疑買唔過　店內告示：供堂食用

照片引起不少網民討論，有人批評「樣都睇唔到，少咗件都唔知」，「紙盒好易養細菌，買唔過」、「買嗰陣都睇唔到佢係乾晒定新鮮啲，真係玩嘢咩」、「抽盲盒」、「隨時入邊啲壽司壞曬（晒），個盒都未凍」；有人則猜測「Donki可以拎去坐低食，咁就係當堂食」；亦有人留言建議「可用玻璃蓋，攞走轉紙盒」；另有人認為「咁樣搞法，飲食業好快玩完」、「冇人買商家就會同政府嘈」。

據了解，是店內堂食轉為紙盒紙蓋，有告示標明「如欲於店內享用食物，請選購貼有可於店內享用標籤的食品」。