英格蘭聯賽盃四強　車路士6比1米杜士堡　兩回合6比2晉身決賽

【有線新聞】英格蘭聯賽盃四強次回合，車路士主場6比1大勝米杜士堡，兩回合6比2率先晉身決賽。

藍衫車路士首回合輸0比1，今場一吐烏氣，保查剔高一射，省中侯臣計成烏龍波，15分鐘領先。史達寧乖巧後腳放落底線，門前的梅迪歷被閂到，還有安素費南迪斯把握機會掃入網，29分鐘拉開。複製入球方程式，同樣是右路地波傳中，史達寧助攻迪沙斯，36分鐘三球在手。
首回合連環失機，高爾龐馬亦入個夠，42分鐘燙射得手，車路士半場拋離4比0。從後截走巴拉沙，推前假射一腳，把攝照師騙到，第二下才真。
英超排第9的車路士，前半季表現未如理想，主帥普捷天奴可以暫時鬆一口氣。換邊後的77分鐘，高爾龐馬射入個人第二球。
干拿加拉查直線送馬度基一程，被紅衫包圍都可以擺大位抽入，81分鐘贏到6比0。
英冠的米杜士堡88分鐘反擊，摩根羅渣士射入遠柱，終於破蛋。足球就是如此，無輪輸贏，球迷一樣力撐，抬起頭重新出發。
車路士最後大勝6比1，兩回合贏6比2，會跟利物浦或富咸爭冠軍。