港人山姆超市掃貨狂中伏　食撈河粉有膠味　一款女性用品震驚網民：半日已解體

【有線新聞】自通關後，港上北上消費已成為習慣，而大型超市近期成為港人必到地點之一，山姆超市更是近期大熱之選。有港人到山姆超市購物後大呻中伏，形容食品味道差、電器表現未如理想等，更在facebook開設群組，分享中伏經驗，其中有港人購買一款女性用品後，形容感受「未試過咁差」，引起網民討論。

每逢周末、長假期，大批港人都北上消費玩樂，近期大熱的就是國際大型超市山姆超市。每逢遇上熱潮，不少港人都會在facebook開設群組或關注組，分享優惠或中伏經驗，最近則有港人開設「山姆中伏分享group」，引起熱烈討論。有網民購買一款日本品牌的室內加熱器，但試用後效果不似預期，「開咗半粒鐘一啲都唔熱，要開兩個鐘才一啲啲熱，體感根本就達唔到取暖嘅效果，超伏。」有網民解釋指，相關的加熱器屬充油式，加熱速度慢，但不會皮膚乾燥；而港人常用的暖風機則速熱，但會比較乾燥。

越式河粉有膠味　衛生巾護墊半日解體

食品方面，有港人買了兩款內地品牌拌粉，分別是麻辣牛肉拌粉和越式西貢河粉，形容口味極重，「麻辣粉鹹到辣到食唔到，根本係撈米線十倍鹹，越式西貢河，湯底香濃牛肉香精味，食完要飲兩日水，先解決到口乾問題，食一半食唔到，全部直送垃圾桶。」事主又指出，進食時有膠味，「感覺有陣膠味…如果你唔落咁重味，會蓋唔到陣膠味。」

除了食品、電器外，個人護理產品亦港人重點掃貨目標，有港人購買一款外國品牌的衛生巾，發現護墊品質差劣，內層側向左邊，批評「全部都係側埋一邊，用過咁多個牌子都未試過咁差。」不少網民認為，個人衛生用品應在香港購買，「意大利嘢都咁差」、「呢隻堅唔好用，用半天已解體」。

山姆超市是美國零售商沃爾瑪公司（Walmart）旗下的大型倉儲式超市，至今已有約40年歷史。內地首家山姆超市早於1996年落戶深圳，最大特色是採用會籍收費，年費約200元人民幣，所有門店均提供各種貨品，包括食品、家居用品、户外運動器材及用品、寵物用品、大型兒童玩具等，規模龐大。