孫慧雪FB千字文列工人7宗罪 玩到成晚失蹤兼推窗落街
藝人孫慧雪（雪雪）雖然已為人母，但仍然活躍於幕前工作，所以一直有請工人姐姐幫忙打理家務。不過，雪雪每次請工人都有不愉快事情發生，包括欠債、偷東西、甚至是犯罪集團成員，相當誇張！
「2:33am都唔返屋企」
近日，雪雪在Facebook透露請了位新工人姐姐，不過這次又有問題出現。雪雪凌晨出文向網民求救，表示：「新請咗位姐姐，今日放假但到而家2:33am都唔返屋企，你哋覺得應該點做？」不少網民獻計，建議雪雪向中介公司反映，後來雪雪指：「姐姐最後喺今朝6點先返，一路瞓覺唔起身，我自己洗晒碗餵完小朋友，十一點先叫醒佢，佢話我唔舒服咪唔返嚟囉！我話你唔洗講大話啦！所以已經同佢分手。」
隨後，雪雪又出文向大家分享姐姐的七大不思議事件，讓網民一起吃花生，以下為雪雪原文。
1. 第一天上班已失聯
「本來應該到嗰日，即第一日，佢失聯，後來再出現話前僱主幫佢搞farewell party，所以失蹤咗一日。」
2. 只幫自己洗衫
「嚟到唔做嘢，我洗衣籃傾瀉，我哋問佢係咪唔識用洗衣機啊？不如教你呀，佢話：我識呀，已經幫自己洗咗幾機衫，然後我先發現，係喎！晾起全部都係佢啲衫！」
3. 要求每晚都有me time
「佢嚟到第一日，要求每晚都要有me time做運動，都唔緊要，但係佢晚晚一早就自己收工，唔會再幫手，然後攞瑜伽蓆，換晒full set運動衫，做瑜珈！跟住又係洗自己啲做完運動嘅full set運動衫唔係我哋啲衫」
4. 鍾意匿喺男朋友屋企
「面試時，佢話自己好內向，唔鍾意出街，剩係會匿喺屋企，除非有緊要事要辦先出去，下午兩三點都已經會喺屋企，結果第一日放假，佢話夜晚11點先返，我哋O晒嘴，話佢interview都唔係咁講，佢話我鍾意匿喺男朋友屋企，可能我幫慣外國人做嘢囉，同你地style唔同」
5. 要求請多個姐姐幫手
「佢做咗幾日，表明自己就做唔晒啲嘢㗎啦，你哋請多個姐姐嘅時候，我再同佢傾，點樣合作做你哋屋企啲嘢啦，其實我屋企只得我、老公同小朋友，小朋友已經盡量自己湊，接送都係我同老公，有家教老師喺度嘅時候，佢都唔幫我哋執床，自己去咗me time」
6. 推窗落街
「最誇張嘅係：第一日入屋，佢用神力推咗我屋企隻窗落街！真係非常好彩係，無傷到人！之後佢同我講， 隻窗係自己跌咗落街！（註：隻窗喺工人房）利申：我哋屋企係新裝修，仲要有驗窗，可能係之前啲姐姐整鬆咗，都唔可以完全怪晒佢嘅！不過係我人生入邊一件好難忘嘅事！」
7. 唔幫手攞嘢
「叫佢幫我哋攞嘢，佢話佢攞唔到，叫我哋自己攞」
嬲爆表示：會寫好封信報俾入境處！
不少網民及藝人朋友都有在雪雪的帖文下留言，有網民分享到親戚工人的離譜情況：「表姐個工人姐姐，話說星期六放假，問定佢大約幾點返，佢笑一笑無講野，就一去不覆返，一星期後警察叔叔通知，收到入境處回覆，姐姐已入俄羅斯境喇。」
藝人吳若希建議：「不如報俾入境處聽，black list佢啦。」雪雪就回覆：「為咗大家著想，我會寫好呢封信！」而藝人鄭世豪就搞笑提議：「等睇你join暴龍哥講都已經齊料的的一集。」雪雪就說：「睇吓暴龍哥嫌唔嫌棄！」
（全文完）
常見問題：
問：孫慧雪遇過的工人有多離譜？
答：雪雪每次請工人都有不愉快事情發生，最誇張試過請中犯罪集團成員… 詳情請睇
問：孫慧雪如何處理離譜工人？
答：雪雪話：「你唔洗講大話啦！所以已經同佢分手」… 詳情請睇
😊 為生活增值 Like 👉有線生活FB
💪 睇健康貼士 Like 👉有線健康FB
🔔 接收最新生活資訊 follow 👉 有線生活IG @icable.life
